اولاً كلنا عارفين ان في دعوات على الفيس بوك و مختلف الشبكات الاجتماعية بمقاطعة جوجل بدأ من اليوم و حتى يوم 26 سبتمبر ان شاء الله .
ثانياً قبل ما اقول اي حاجة محتاج شخص واحد يرد عليا و يقولي ايه فائدة مقاطعة جوجل؟؟!!
ثالثاً لما حد يقول قاطع محرك البحث Google و قاطع Youtube لا لو ناوي تقاطع قاطع كل منتجات شركة جوجل مش الاتنين دول بس غير كده اغلبية الناس و انا منهم مش هتقدر تستغنى عن محرك البحث جوجل لانه بيقدم نتائج ممتازة و مفيش بديل له حتى محرك بحث Bing مايكروسوفت بذات نفسها بتعترف بفشله هتقولي ازاي؟؟ اقولك ان مايكروسوفت مقدمة اداة لتقييم اداء محرك البحث مقارنة بمحرك بحث جوجل و هي اداة bing it on و الاداه ذات نفسها بتعترف بتفوق محرك بحث جوجل !!
غير كده لو ناوي تقاطع جوجل يبقى بلاش تستخدم متصفح الكروم ولا متصفح الفايروفوكس لان في شراكة ما بين جوجل و فايروفوكس و كمان بلاش تنسى ترمي تليفونك اللي شغال بنظام الاندرويد و كلنا عارفين ان الاندرويد مقدم من جوجل بلاش كمان تقرأ الكلام الموجود هنا لان مدونة Blogger مقدمة من جوجل
هكرر سؤالي تاني ايه الاستفادة لما تقاطع جوجل يوم ولا اتنين ولا شهر و بعدين ترجع تاني تستخدمه لو عايز فعلاً تقاطع و يكون بأستفادة يبقى وفر بديل قوي لجوجلو منتجاتها و قرر بعدها انك هتقاطع جوجل بشكل تام و هتستغنى عنه
للعلم الشخص اللي اسمه مارتن جوزنبولت اللي قال تصريحات ان جوجل مش هتحذف الفيلم المسئ و قالوا ان ده المدير التنفيذي لشركة جوجل هو اصلاً مش المدير التنفيذي لشركة جوجل !!
ليست هناك تعليقات:
إرسال تعليق